ထိုင်းနိုင်ငံ၊ ဗန်ကောက်မြို့ ဈေးဝယ်စင်တာအတွင်းဖြစ်ပွားခဲ့သည့် ပစ်ခတ်မှုဖြစ်စဉ်တွင် အသက်ဆုံးရှုံးခဲ့ရသည့် မြန်မာနိုင်ငံသားနှင့်စပ်လျဉ်း၍ နိုင်ငံခြားရေးဝန်ကြီးဌာနမှ လိုအပ်သည်များ ဆက်လက်ကူညီဆောင်ရွက်ပေးလျက်ရှိ (၆-၁၀-၂၀၂၃ ရက်)

(၆-၁၀-၂၀၂၃ ရက်၊ နေပြည်တော်)

ထိုင်းနိုင်ငံ၊ ဗန်ကောက်မြို့၊ Siam Paragon ဈေးဝယ်စင်တာတွင် ၃-၁၀-၂၀၂၃ ရက်နေ့တွင် ဖြစ်ပွားခဲ့သည့် သေနတ်သမားတစ်ဦး၏ပစ်ခတ်မှုကြောင့် မြန်မာနိုင်ငံသား ဒေါ်မိုးမြင့်၊ အသက် (၃၁)နှစ်၊ သေဆုံးခဲ့သည့်ဖြစ်စဉ်နှင့်စပ်လျဉ်း၍ ဒုတိယဝန်ကြီးချုပ်နှင့် နိုင်ငံခြားရေးဝန်ကြီးဌာန၊ ပြည်ထောင်စုဝန်ကြီးမှ ကျန်ရစ်သူမိသားစုထံပေးပို့သည့် ဝမ်းနည်းကြောင်းသဝဏ်လွှာကို ရန်ကုန်မြို့ရှိ နိုင်ငံခြားရေးဝန်ကြီးဌာန၊ တာဝန်ရှိသူများက ကျန်ရစ်သူမိသားစုထံ လက်ရောက်ပေးအပ်ခဲ့ပြီး၊ စာနာထောက်ထားကြောင်းနှင့် ဝမ်းနည်းကြောင်း အားပေးစကားပြောကြားခဲ့သည်။

ကျန်ရစ်သူမိသားစုဝင်များ၏ဆန္ဒအရ သေဆုံးသူဒေါ်မိုးမြင့်အား ၈-၁၀-၂၀၂၃ ရက်နေ့ တွင် Changwattana ဘုန်းကြီးကျောင်း၌ ကောင်းမွန်စွာမီးသင်္ဂြိုဟ်နိုင်ရေး မြန်မာသံရုံး၊ ဗန်ကောက်မြို့မှ ကူညီဆောင်ရွက်ပေးလျက်ရှိပြီး ကျန်ရစ်သူမိသားစုမှ ဈာပနအခမ်းအနားသို့ သွားရောက်နိုင်ရေးအတွက်လည်း ဗန်ကောက်မြို့၊ မြန်မာသံရုံးနှင့် နိုင်ငံခြားရေးဝန်ကြီးဌာနတို့အနေဖြင့် လိုအပ်သည်များ ကူညီဆောင်ရွက်ပေးလျက်ရှိသည်။

သေဆုံးသူ၏ မိသားစုဝင် (၃) ဦးသည် ၆-၁၀-၂၀၂၃ ရက်နေ့၊ ၁၇:၂၅ နာရီတွင် လေကြောင်းပျံသန်းအမှတ်၊ UB-017 ဖြင့် ရန်ကုန်မြို့မှ ဗန်ကောက်မြို့သို့ ထွက်ခွာသွားခဲ့ရာ နိုင်ငံခြားရေးဝန်ကြီးဌာန၊ ရန်ကုန်မှ တာဝန်ရှိသူများက လိုက်ပါပို့ဆောင်ခဲ့သည်။

မြန်မာဘက် နိုင်ငံခြားရေးဝန်ကြီးဌာနနှင့် သံရုံးမှတာဝန်ရှိသူများအနေဖြင့် ထိုင်းနိုင်ငံမှ သက်ဆိုင်ရာတာဝန်ရှိသူများနှင့် ပူးပေါင်း၍ လိုအပ်သည်များ ဆက်လက်ကူညီဆောင်ရွက်ပေးသွားမည်ဖြစ်သည်။